पोखरा । नव आदर्श सामुदायिक विकास समाज लामाचौरले विगत २८ वर्ष देखि गर्दै आएको लामाचौर तीज महोत्सवको तयारी शुरु गरेको छ ।
समाजको २९ औँ वार्षिकोत्सवको अवसरमा आयोजना हुने २९ औं संस्करणको लामाचौर तीज महोत्सवलाई सफल बनाउनको लागि पोखरा वडा नं. १६ र १९ का आमा समूह लगायत विभिन्न संघ संस्थाहरु र सरोकारवालासँग आवश्यक तयारीका विषयमा छलफल गरेका छन् ।
तीज महोत्सवमा तीज गीत सहित खुला भलिबल प्रतियोगिता, अन्तर मा.वि. छात्रा भलिबल प्रतियोगिता, विद्यालय नृत्य प्रतियोगिता, औद्योगिक मेला तथा विभिन्न स्टलहरु र राष्ट्रिय कलाकारद्वारा विविध सांस्कृतिक प्रस्तुतिलाई यस वर्ष पनि निरन्तरता दिईने समाजले जनाएको छ ।
महोत्सव सफल बनाउनको लागि गठित महिला समन्वय समितिले शुक्रबार विभिन्न आमा समुह र महिला जनप्रतिनिधिसँग छलफल गर्यो ।
छलफलमा पोखरा १६ का वडा सदस्य मञ्जु बस्यालले संस्कृति संरक्षणका लागि आयोजना हुने जुनसुकै कार्यक्रमलाई सफल बनाउन स्थानीय सरकार प्रतिबद्ध रहेको बताउनुभयो । वडा नं. १९ का वडा सदस्य दुर्गादेवी बस्नेतले योजनाबद्ध रुपमा गरिने कार्यक्रमले निरन्तरता पाउने र सफल हुने बताउनुभयो ।
समाजका अध्यक्ष दिनेश भण्डारीको अध्यक्षतामा भएको कार्यक्रममा पूर्व अध्यक्ष एवं अर्थ संयोजक कमल थापा, पूर्व अध्यक्ष एवं सत्कार संयोजक समितिका अध्यक्ष संजय अधिकारी, पूर्व अध्यक्ष रेश्मा शेरचन अधिकारी ,प्रथम उपाध्यक्ष शोभा केसी लगायतले कार्यक्रमको सफलताको शुभकामना व्यक्त गर्दै आफूले सकेको सहयोग रकमहरू बोल्दै थप सहयोग गर्ने वचनबद्धता व्यक्त गरेका थिए ।
सिर्जना आमा समुहका अध्यक्ष शारदा पौडेलले स्वागत र कार्यक्रमलाई महिला समन्वय समितिका सदस्य गीता भण्डारीले सञ्चालन गर्नुभएको थियो ।
समाजले यहि भाद्र ८ गते देखि १० गतेसम्म ३ दिन महोत्सवको तयारी गरेको छ ।
