काठमाडौं, फागुन ४ । नेपाली साङ्गीतिक क्षेत्रमा पछिल्लो समय नयाँ–नयाँ सिर्जनाहरु आउने क्रम जारी रहेको छ। यसैक्रममा प्रेम र रोमान्सको नयाँ स्वाद बोकेको म्युजिक भिडियो ‘बुलेट बाइकमा’ सार्वजनिक भएको छ।
चर्चित टिकटकर रवि चन्द ठकुरी र कविता नेपालीको आकर्षक अभिनय रहेको यस भिडियोले छोटो समयमा नै दर्शकको मन जित्न सफल भएको छ ।
१४ फेब्रुअरी अर्थात् “भ्यालेन्टाइन डे”को अवसर पारेर सार्वजनिक गरिएको यस भिडियोले छोटो समयमै युट्युवमा १ लाखभन्दा बढी भ्यूज पार गरिसकेको छ।
यस गीतमा टेक बिसी र सिमरन परियारको सुमधुर स्वरले प्रेमिल भावनालाई जीवन्त बनाएको छ। यस गीतको शब्द तथा संगीत सन्तोष सुनारले तयार पार्नुभएको हो भने संगीत संयोजन Anxmus ले गरेको हो।
मिक्सिङ र मास्टरिङ चर्चित संगीतकर्मी बृजेश श्रेष्ठले गर्नुभएको छ । विशाल काइनीको कोरियोग्राफी र सान थापाको निर्देशनमा बनेको यस म्युजिक भिडियोमा रवि र कविताको केमेस्ट्री आकर्षक ढंगले प्रस्तुत गरिएको छ।
यस भिडियोको छायाङ्कन नवराज उप्रेतीले गर्नुभएको हो भने सम्पादन विवेक सुनार र कलर संयोजन मिलन विश्वकर्माले गर्नुभएको छ।
भिडियोमा बुलेट बाइकमा घुमाउन लैजान गरिएको आग्रह र नृत्यले दर्शकलाई मनोरञ्जन प्रदान गरेको छ ।
विषेशगरी यस गीतको भिडियोमा रहेको दृश्य, संगीत र अभिनयको सन्तुलित संयोजनले यसलाई युवापुस्तामाझ अझ लोकप्रिय बनाउने संकेत देखिएको छ।
रवि चन्द ठकुरीको आधिकारिक युट्युब च्यानलमार्फत सार्वजनिक गरिएको यो भिडियोले प्रेमलाई ‘स्पिड’ र ‘स्टाइल’ दुवै दिएको प्रतिक्रिया दर्शकबाट पाइरहेको छ।
अहिलेको डिजिटल युगमा प्रेम कथालाई नयाँ शैलीमा प्रस्तुत गरेको ‘बुलेट बाइकमा’ बोलको यो गीतले नेपाली म्युजिक भिडियो क्षेत्रमा अर्को सफल कडी थपेको देखिन्छ।
