काठमाडौं । काठमाडौं महानगरले कोटेश्वरस्थित फुटपाथको भित्तामा नेपाली राष्ट्रिय फुटबल खेलाडी सावित्रा भण्डारी ‘साम्बा’ र नेपाली ‘म्यारोडोना’ भनेर चिनिने मणिविक्रम शाहको चित्र बनाएको छ ।
मौलिक तथा प्राचीन महत्वका चित्रकलाबाट सहरको सुन्दरता अभिवृद्धि गर्ने कामलाई काठमाडौँ महानगरपालिकाले पुनः सुचारु गरेको छ ।
ललित कला प्रज्ञा प्रतिष्ठानसँगको सहकार्यमा सार्वजनिक पर्खालका भित्ताहरूमा कलात्मक चित्र लेखनलाई निरन्तरता दिइएको हो । यसका लागि ०८० फागुन १७ गते सम्झौता भएको थियो ।
पहिलो चरणमा सुन्धारा, नयाँ बानेश्वर, प्रदर्शनी मार्गका भित्ताहरू लगायतका काम सम्पन्न भएका छन् ।
अहिले कोटेश्वर सरस्वती पार्कमा विभिन्न फुटबल र फुटबलसँग सम्बन्धित व्यक्तिहरूको चित्र बनाउने कार्य भइरहेको छ ।
नेपाली टिमकी स्टार फरवार्ड खेलाडी साम्बाले पछिल्लोपटक साफ महिला च्याम्पियनसिपको सेमिफाइनलमा भारतविरुद्ध उहाँले गरेको गोलले खेलप्रेमीको मन जितेको थियो ।
मणिविक्रम शाह नेपाली फुटबलप्रेमी माझ ‘म्यारोडोना’का नामले परिचित हुनुहुन्छ । उहाँले सन् १९८५ देखि १९९८ सम्म राष्ट्रिय टोलीबाट खेल्नुभएको थियो । ५१ वर्षको उमेरमा २०७५ मा उहाँको निधन भइसकेको छ । सन् १९९३ ढाकामा भएको छैटौँ दक्षिण एसियाली खेलकुदमा नेपाललाई स्वर्णपदक दिलाउन उहाँको महत्त्वपूर्ण भूमिका थियो ।
खेलाडीको चित्र बनाइरहनुभएको कलाकार दुर्गा बहादुर ( डीबी ) भण्डारीले लोकप्रिय फुटबलरको चित्र बनाउन पाउँदा खुसि लागेको बताउदै मान्छेहरू मैले बनाएको चित्रसँग सेल्फी, भिडियो खिचेको देख्दा मज्जा आउँने बताउनुभयो ।
यसपछि त्रिपुरेश्वर रङ्गशालाको भित्तो, माइतीघरबाट बबरमहल जाँदा दायाँतर्फको भित्तो, बानेश्वर मीनभवन, लैनचौर समाज कल्याण परिषद्को भित्ताहरू चित्र कोरिने महानगरपालिकाले बताएको छ ।
यसरी कोरिएका चित्र जोगाउन नागरिक तहबाट दायित्व निर्वाह हुने महानगरपालिकाले अपेक्षा गरेको छ ।
चित्र भएका भित्तामा नछुने, कुनै रङ्ग नछर्किने, पोस्टर वा कागज नटाँस्ने, चित्रसँग तस्बिर खिच्दा नटाँसिइ अलग्गे खिच्न, अन्य कुनै बस्तुले नलेख्ने जस्ता काम महानगरपालिकाले नागरिकबाट गरेको अपेक्षा हो ।
