काठमाडौं । नेपाली सेनाले मनसुनजन्य विपद् व्यवस्थापनका लागि यो वर्ष ३ हजार ३४१ जनालाई विपद् प्रतिकार्य तालिम दिएको छ ।
सैनिक प्रवक्ता गौरवकुमार केसीका अनुसार २०७६ सालदेखि नै सर्वसाधारणलाई समुदायमा विपद् प्रतिकार्यमा जोड्ने नीति अनुसार २७ हजार ९६६ जनालाई तालिम दिइसकिएको छ ।
केसीले प्रदेश सरकार र स्थानीय पालिकासँग समेत सहकार्य गरेर सर्वसाधारणलाई यस्तो तालिम दिइएको जनाउनुभयो ।
उहाँले प्रत्येक पृतना हेडक्वार्टरहरुमा कम्पोसाइट सर्च एण्ड रेस्क्यू (सीएसएआर) टिमले मातहतका फौजलाई समय समयमा तालिम दिएको र तालिम प्राप्त फौजले स्थानीयसँग समेत मिलेर विपद्को प्रतिकार्य गर्ने बताउनुभयो ।
केसीका अनुसार, सेनामा प्रत्येक युनिटको एक तिहाइ फौज हरहमेसा विपद् प्रतिकार्यका लागि तयारी अवस्थामा राखिने गरिएको छ ।
उहाँले यसको साथै छुट्टै विशेषज्ञ तालिम प्राप्त जनशक्तिको संख्यालाई बढाउँदै लगिएको बताउनुभयो ।
केसीले विपद्मा खटिनका लागि सेनाको कुनै पनि युनिटले कसेको निर्देशन नपर्ने विपद्को खबर पाउने वित्तिकै घटना भएको ठाउँमा तैनाथ फौज खटिएर उद्दार कार्य गर्न सक्ने बताउनुभयो ।
परिचालन भएपछि मात्र त्यसको जानकारी माथिल्लो निकायमा दिइने उहाँले बताउनुभयो ।
मनसुनजन्य विपद्लाई लक्षित गरेर मुलुकका २७ जिल्लाका ६१ स्थानमा अभ्यास मनसुनको चौथो श्रृंखला चलाइएको पनि केसीले बताउनुभयो ।
केसीले मनसुनको समयमा देशका विभिन्न स्थानमा हुने भारी वर्षाबाट बाढी, डुबान र पहिरो जस्तो प्राृकितक विपद्बाट हुनसक्ने क्षतिलाई मध्यनजर गरेर प्रभावितलाई तत्काल उद्दार र राहत कार्य प्रभावकारी रुपले सञ्चालन गर्न यो अभ्यास गरिएको बताउदै राष्ट्रको विपद् क्षमता अभिवृद्धि गर्न सेनाले विभिन्न तहमा सरोकारवालालाई सहभागी गराएर एकीकृत अभ्यास हातेमालो पनि सञ्चालन गर्दै आएको जनाउनुभयो ।
केसीले नेपालमा सोमबारबाट कोशी प्रदेशमार्फत मनसुन भित्रिसकेको र यस्तोमा मनसुनजन्य विपद् प्रतिकार्यका लागि सैनिक टोलीलाई तैनाथ राखिएको बताउनुभयो ।
