काठमाडौँ– अभिनेत्री केकी अधिकारीले गुपचुप विवाह गरेको चर्चा फिल्मनगरीमा विहानदेखि नै छ ।
आफ्नो प्रेम जीवनलाई सोसल मिडिया र मिडियामा छताछुल्ल बनाउन पछि नपर्ने कलाकारहरूको भिडमा केकीले भने आफ्नो सम्बन्धलाई गोप्य राख्ने अभिनेत्रीमा पर्छिन् ।
यसैले गर्दा पनि उनको विवाहको खबर आएता पनि को सँग ? र कहाँ ? भन्ने खुल्न सकेन ।
उनका निकटतम सहकर्मीलाई समेत विवाह हो वा होइन भन्ने बारेमा पूर्ण रूपमा जानकारी छैन ।
यद्यपि उनले विवाह गर्न लागेको व्यक्तिको परिचय सार्वजनिक भएको छ । केकीले रोजेकी जीवनसाथी व्यवसायी रोहित तिवारी हुन् ।
केकी र रोहित केही समयदेखि प्रेममा थिए । केकीका श्रीमान् रोहित हाम्रो बजार डटकमका सीईओ तथा फुडमारियोका सह–संस्थापक र सीइओ हुन् ।
तर उनको विवाह भएको हो वा होइन भन्नेमा उनकै निकटम साथीहरू पनि विश्वस्त छैनन् ।
साँझदेखि विवाह भएको खबरकै बीच केकीको मेहन्दी कार्यक्रमको तस्वीर सार्वजनिक भएको छ । यो तस्वीर आजको हो वा हिजो को ? यो अझैँ खुल्न सकेको छैन ।
उनको नजिकी एक साथीले उनीहरूको आज मेहेन्दी भएको र भोलि विवाह हुने बताइन् ।
‘हिजो केकी एक समारोहमा नै थिइन् । यद्यपि तयारी केही समय यता चलेको थियो । तर, मैले थाहा पाएसम्म विवाह भोलि हो’ उनले भनिन् । तर फिल्मनगरीमा केकी आज सानो जमघटका बीच रोहितसँग लगनगाँठो कसको चर्चा छ । फिल्मी करिअरमा पनि अफेयरका कुराहरू कहिल्यै सार्वजनिक रूपमा आउन नदिने केकीले सावधानी अपनाउने गरेकी छिन् । प्रेम र विवाहजस्ता कुराहरू सेलिब्रिटीको ‘प्राइभेसी’ भित्र पर्छन् भन्ने मान्यता राख्ने केकीले विवाह गरिन् वा बाँकी छ ? त्यो त भोलि थाहा हुने नै छ । तर, जीवनसाथी भने छनौट गरिसकेकी छिन् ।