काठमाडौं, १८ फागुन । निर्वाचन आयोगले घरघरमा मतदाता शिक्षा पुर्याउन सफल भएको जनाएको छ ।
निर्वाचन आयोगले ३ फागुनदेखि मतदाता शिक्षा कार्यक्रम सुरु गरेको थियो । आइतबारसम्म चलेको मतदाता शिक्षा कार्यक्रम अन्तर्गत आम मतदातालाई सही, तथ्यपरक र उपयोगी जानकारी प्रदान गरिएको छ । जसमार्फत जिम्मेवार र सचेत मतदान संस्कृतिको विकास हुने आयोगको अपेक्षा छ ।
मतदानको कार्यमा आम मतदाताको सहभागीता अभिवृद्धि र बदर मतको संख्या न्यूनीकरण गर्नु मतदाता शिक्षा कार्यक्रम प्रभावकारी हुने आयोगको अपेक्षा छ ।
मतदाता शिक्षाका लागि आयोगले आम सञ्चार माध्यम, सामाजिक सञ्जाल र स्वयंसेवक परिचालन गरेको थियो ।
देशभरका नगरपालिका तथा गाउँपालिकाका स्थित ६ हजार ७४३ वडामा ३ फागुनदेखि १७ फागुनसम्म मतदाता शिक्षा स्वयंसेवक परिचालन भएका थिए ।
स्वयंसेवकले मतदाताले मतदान प्रक्रिया, मतपत्रको प्रयोग, गोप्य मतदानको महत्व, निर्वाचन आचारसंहिता तथा गलत एवं भ्रामक सूचनाबाट बच्ने उपायबारे जानकारी दिएका छन् ।
निर्वाचन आयुक्त डा. जानकीकुमारी तुलाधरले स्थानीय तहको सहभागिता र समुदायको प्रत्यक्ष संलग्नता मार्फत मतदाता शिक्षा कार्यक्रम सञ्चालन भएको बताउनुभयो ।
उहाँले फागुन ३ गतेदेखि १७ गतेसम्म मतदाता शिक्षा कार्यक्रम अन्तर्गत स्वयमसेविका परिचालन गरेको बताउदैं स्वयमसेविकाहरूले घरदैलोमा पुगेर मतदाता शिक्षा दिएको बताउनुभयो ।
विभिन्न भाषामा समेत मतदाता शिक्षा कार्यक्रम सञ्चालन गरिएको जानकारी दिनुभयो ।
आजदेखि भने मौन अवधि सुरु हुँदैछ । आयोगले यही ४ फागुनदेखि १८ फागुन आज सोमबारसम्मका लागि निर्वाचन प्रचारप्रसारको समय निर्धारण गरेको थियो । २१ गते मतदान हुनेछ ।
