काठमाडौं । विवाहित महिलाको सौन्दर्य प्रतियोगिता ‘मिसेस नेपाल वल्र्ड २०२५’ को उपाधि बुटवलकी रक्षा पन्तले जित्नुभएको छ ।
रिबन इन्टरटेनमेन्टद्धारा आयोजित नेपाल पुलिस क्लबमा शनिबार भएको ग्राण्ड फिनालेमा २४ प्रतिस्पर्धीलाई पछि पार्दै उहाँले उपाधि चुम्नुभएको हो ।
फिनालेमा प्रहरी पूर्वप्रमुख सर्वेन्द्र खनालले समाजमा विद्यमान विकृतिमध्ये तपाईं के हटाउन चाहनुहुन्छ भन्ने निर्णायक प्रश्नको जवाफ दिनुभएको थियो ।
मस्ट फोटोजेनिकको उपाधि जितेकी उहाँले अमेरिकामा आयोजना हुने बताइएको ‘मिसेस वल्र्ड २०२६’ को प्रतिस्पर्धामा नेपालको प्रतिनिधित्व गर्ने अवसर पनि प्राप्त गर्नुभएको छ ।
मिसेस नेपाल वल्र्डमै विद्या चौहान फस्ट रनर्सअप, एलिना केसी सेकेन्ड रनर्सअप, निर्मला सुनुवार थर्ड रनर्सअप घोषित भएका छन् ।
प्रतियोगितामा सञ्जु भट्ट मिसेस नेपाल इन्टरनेसनल हुनुभयो । दीपिका तामाङ एमएस नेपाल इन्टरनेसनलको विजेता हुनुभयो ।
मिसेस नेपाल इन्टरनेसनल विजेताले सिंगापुरमा हुने ‘मिसेस इन्टरनेसनल’ र एमएस नेपाल इन्टरनेसनल विजेताले सिंगापुरमै हुने एमएस इन्टरनेसनल प्रतियोगितामा नेपालको तर्फबाट भाग लिन पाउने छन् ।
उक्त अवसरमा अभिनेत्री, कथाकार तथा गीतकार पूजा चन्दलाई ३ दशकदेखि नेपाली चलचित्रका साथमा कला, संस्कृति र साहित्यको क्षेत्रमा योगदान पुर्याए वापत मानार्थ मिसेस नेपाल वल्र्ड २०२५ बाट सम्मानित गरेको थियो ।
