काठमाडौँ । त्रिभुवन विश्वविद्यालय शिक्षण अस्पताल, महाराजगञ्जका ग्यास्ट्रो सर्जन प्रा.डा. रमेशसिंह भण्डारीले शनिबार साँझ ठमेलस्थित एलओडीमा एकल कन्सर्ट प्रस्तुत गर्नुभएको छ ।
कन्सर्ट ‘नीलो आकाश’ गीतबाट सुरु गर्नुभएको कलेजो प्रत्यारोपण विशेषज्ञ भण्डारीले करिब दुई घण्टासम्म आफ्नै ७ सहित १८ वटा गीत प्रस्तुत गर्नुभयो ।
‘When Profession Meets Passion, Magic Happens’ नामक सांगीतिक कार्यक्रममा उहाँलाई गिटारिस्ट देव लामा र रोशन श्रेष्ठसहितको टोलीले साथ दिएको थियो ।
झण्डै १८ वर्षदेखि चिकित्सकीय क्षेत्रमा सक्रिय भण्डारीका ओढेर पछ्यौरी, सकिएन, धन्यवाद, कसरी भनूँ, तिम्रो नै माया, एउटा जीवन लगायतका गीत सार्वजनिक भइसकेका छन् ।
डा.भण्डारीले चिकित्सा पेशामा आफू आबद्ध भएकाले सांगीतिक कार्यक्रम गर्नु नौलो अनुभव भएको बताउनुभयो । उहाँले पेशासहित प्यासनलाई पनि जीवन्त राख्न आफूले सांगीतिक प्रस्तुति दिएको बताउनुभयो ।
