पोखरा । अमेरिकामा व्यवसायीक रुपमा टेनिस खेल्दै आउनुभएको पोखरेली खेलाडी अभिषेक बास्तोला आइटिएफ वरियताको १७९० औं स्थानमा रहनु भएको छ ।
पोखराबाट टेनिस खेल्न सुरु गर्नुभएको २३ वर्षीय बास्तोला नेपालका लागि पहिलो पटक आइटिएफको वरियतामा पर्न सफल हुनुभएको हो ।
अमेरिकामै अध्ययन गर्दै आइरहेका उहाँले विभिन्न अन्तराष्ट्रिय प्रतियोगिता खेल्नुभएको छ ।
विश्ववारियताको बारेमा जानकारी दिन आयोजित पत्रकार सम्मेलनमा बास्तोलाले विश्ववारियताको दुई हजार भन्दा तल पर्नु सामान्य कुरा नभएको बताउनुभयो ।
उहाँले दशौं हजार खेलाडीहरुको बीचमा समेत १७९० स्थानमा आउनु खेलाडीको लागि ठूलो उपलब्धि भएको बताउदै आफु देशका लागि खेल्ने भएकाले बाकीँ यात्राका लागि सम्बन्धित निकायले समेत सहयोग गरिदिनुपर्नेमा जोड दिनुभयो ।
अभिषेकले हाल सम्म विभिन्न १४ राष्ट्रमा प्रतियोगिता खेलिसकेको अनुभव समेत बटुलिसक्नुभएको छ । उहाँले सन २०२४ को ओलम्पिकको तयारी गरिरहेको जानकारी दिनुभयो ।
