एसीसी प्रिमियर कप क्रिकेटमा मलेसियालाई ६ विकेटले हराउँदै नेपालको सानदार जित सुरुवात

काठ्माण्डौं । नेपालले एसीसी प्रिमियर कप क्रिकेटमा सानदार जितको सुरुवात गरेको छ । त्रिवि क्रिकेट मैदान कीर्तिपुरमा मंगलबार भएको पहिलो खेलमा नेपालले मलेसियालाई ६ विकेटले हराउँदै सानदार जितको सुरुवात गरेको हो ।

मलेसियाले दिएको २ सय ३६ रनको लक्ष्य नेपालले ३६ ओभर २ बलमा ४ विकेट गुमाएर पुरा गरेको हो । नेपालका लागि भीम सार्कीले ७१, कुशल मल्लले नटआउट ७०, कप्तान रोहित पौडेलले ४२ र कुशल भुर्तेलले ३८ रन बनाए । बलिङतर्फ मुहम्मद वकिफ, रिजवान हैदर, विजय उनी र विरनदीप सिंहले १र१ विकेट लिए ।

त्यस्तै नेपालले बैशाख ८ गते ओमानसँग, ११ गते साउदी अरबसँग र १४ गते कतारसँग खेल्नेछ । यस प्रतियोगिताको विजेता टोलीले आउँदो सेप्टेम्बर पाकिस्तानमा हुने एसिया कप खेल्न पाउनेछ । शीर्ष तीन टोलीले जुलाईमा हुने एसीसी इमर्जिङ टिम्स एसिया कप खेल्न पाउनेछ ।

प्रिमियर कपको समूह ए मा नेपाल, ओमान, कतार, मलेसिया र साउदी अरब र समूह बी मा यूएई, हङकङ, कुवेत, सिङ्गापुर र बहराइन छन् । नेपालले तीन खेल कीर्तिपुर मैदानमा र एउटा खेल मूलपानीमा खेल्नेछ ।