काठमाडौं । चलचित्र विकास बोर्डले लघु (छोटा) चलचित्र प्रतियोगिता आयोजना गर्ने भएको छ ।
बोर्डले मौलिक यथार्थपरक, सन्देशमूलक, सांस्कृतिक, ऐतिहासिक, सिर्जनात्मक, कलात्मक, सामाजिक रुपान्तरण र जागरण, सचेतना, लैङ्गिक हिंसा, जातीय विभेद, कुप्रथा, राष्ट्रिय स्वाभिमान, राष्ट्रिय पहिचान र कला संस्कृतिलाई संरक्षण र सम्वद्र्धन गर्ने उद्देश्यले प्रतिस्पर्धा आयोजना गर्न लागेको जनाएको छ ।
प्रतियोगिताबारे बोर्डले केही दिनअघि सार्वजनिक सूचना सार्वजनिक गर्दै प्रतियोगितामा सहभागी हुन बोर्डबाट स्वीकृत ढाँचाको दरखास्त फारम भरी २०८० वैशाख १० गतेसम्ममा चलचित्र विकास बोर्डको कार्यालय वा इमेल fdbnepal@gmail.com मार्फत पेश गर्नुपर्नेछ ।
प्रतियोगितामा उत्कृष्ट तीनले क्रमशः प्रथम, द्वितीय र तृतीय गरी एक लाख ५० हजार, एक लाख र ७५ हजार रुपैयाँ प्राप्त गर्नेछन् ।
पुरस्कृत फिल्मलाई बोर्डले व्यावसायिक तथा गैरव्यावसायिक रुपमा आयोजना हुने राष्ट्रिय तथा अन्तराष्ट्रिय फिल्म महोत्सव, विशेष प्रदर्शनीमा सहभागी गराउने पनि बोर्डले जनाएको छ ।
प्रतियोगितामा सहभाभी हुने फिल्म कम्तीमा ५० प्रतिशत नेपालमा नै छायांकन भएको र ५० प्रतिशत चलचित्रकर्मी नेपाली भएको हुनुपर्नेछ ।
सूचना प्रकाशित भएको मितिले पछिल्ला तीन वर्षभित्र निर्माण भएका फिल्मले मात्र भाग लिन पाउनेछन् र ती फिल्मले चलचित्र विकास बोर्डबाट निर्माण इजाजत लिएको हुनुपर्ने जनाइएको छ ।
सहभागिताका शर्तहरुः–
(१) निर्माता नेपाली नागरिक हुनुपर्नेछ ।
(२) चलचित्र लघु चलचित्र हुनुपर्नेछ ।
(३) लघु चलचित्र नेपाली वा नेपालको राष्ट्र भाषामा निर्माण गरिएको हुनुपर्नेछ ।
(४) सम्बन्धित निर्माता वा निजले अधिकार दिएको व्यक्ति आफै उपस्थित भई दरखास्त दिनुपर्नेछ ।
(५) फाराम पूर्णरूपमा भर्नुपर्नेछ । फाराममा भरिएका विवरणलाई छनोटका लागि अन्तिम आधार मानिनेछ ।
(६) बोर्डले लघु चलचित्र प्रतियोगितामा सहभागी भई पुरस्कृत हुने चलचित्रहरुलाई प्रोत्साहन गर्नका लागि स्वदेश तथा विदेशमा आयोजना हुने अवार्ड, महोत्सव, विशेष शो आदिमा सहभागी गराउन सक्नेछ ।
(७) सूचना प्रकाशन भएको मितिले ३ (तीन) वर्ष भित्र निर्माण भएका लघु चलचित्रहरु मात्र सहभागी हुन सक्नेछन् ।
(८) चलचित्र अवलोकनका लागि चलचित्रको फर्म्याटमाः पासवर्ड भएको कुनै पनि साईटको लिङ्क (Online Link) वा DCP बुझाउनुपर्नेछ ।
(९)लघु चलचित्र बढीमा ६० मिनेट समयावधिको हुनुपर्नेछ ।
(१०) लघु चलचित्र कुनै पनि फर्म्याटमा खिचिएको प्रशोधन गरिएको तथा कुनै पनि प्रविधिको प्रयोग गरी निर्माण गरिएको हुनुपर्नेछ ।
(११) सहभागी हुने लघु चलचित्र चलचित्र विकास बोर्डबाट चलचित्र निर्माण गर्न दिईने ईजाजतपत्र लिएको हुनुपर्नेछ ।
(१२) सहभागिता सम्बन्धी सम्पूर्ण जानकारी बोर्डको कार्यालय वा वेवसाइट http://www.film.gov.np बाट समेत गराइनेछ ।
(१३) सहभागिता सम्बन्धी अन्य शर्तहरु दरखास्त फाराममा उल्लेख भए बमोजिम हुनेछन् ।
(१४) सहभागि हुने लघु चलचित्र चलचित्र विकास वोर्डको स्टोरी बैकं कार्यक्रममा सहकार्य र सहयोग प्राप्त भएको हुनु हुँदैन ।
(१५) लघु चलचित्र छनोटको सर्वाधिकार समितिमा र पुरस्कार सम्बन्धी सर्वाधिकार बोर्डमा निहित रहनेछ ।
(१६) यस सम्बन्धी अन्य कुराहरु बुझ्नु परेमा चलचित्र विकास बोर्डमा सम्पर्क गर्न सकिनेछ ।