काठमाडौं, १३ फागुन । नेकपा एमालेले मेडिकल व्यवसायी तथा एमालेका केन्द्रीय सदस्य दुर्गा प्रसाईंलाई पार्टीबाट निष्कासन गरेको छ ।
नेकपा एमालेको आज शनिबार बसेको सोह्रौ सचिवालय बैठकले पार्टीको नीतिविरुद्धका गतिविधिमा संलग्न भएको भन्दै केन्द्रिय सदस्यबाट हटाउने निर्णय गरेको हो ।
प्रसाईंले केही दिनअघि पार्टीको नीति विपरित पूर्व राजा ज्ञानेन्द्र शाह सहितका राजपरिवारलाई निमन्त्रणा गरेर झापामा छुट्टै अभिायन सुरुवात गर्नुभएको थियो । उहाँले देशमा हिन्दु राष्ट्र र राजतन्त्र फर्काउने पनि वकालत गर्दै आउनुभएको छ ।
त्यसपछि पार्टीले कारबाही गर्ने तयारी गरेपछि प्रसाईँले एमाले छाडेको घोषणा गर्नुभएको थियो ।
प्रसाईँले पार्टी गतिविधिबाहिर रहेर काम गरेकाले यस्तो निर्णय गरिएको एमालेले जनाएको छ ।
कुनै समय माओवादीनिकट रहेका प्रसाईं पार्टीको सदस्य नबन्दै एमालेको २०७८ असोजमा ललितपुरमा भएको विधान महाधिवेशनमा प्रतिनिधि बन्नुभएको थियो । विधान महाधिवेशन सकिएपछि झापामा औपचारिक कार्यक्रम गर्दै उहाँले एमाले प्रवेश गरेको घोषणा गर्नुभएको थियो ।
