काठमाडौं ।
डा. दिलिप मल्लद्वारा लेखिएको दुई पुस्तक काठमाण्डौंमा विमोचन भएका छन् । पुस्तकको विमोचन कांग्रेस नेतृ डा.आरजु राणा देउवाद्धारा गरिएको थियो ।
प्रमुख अतिथि नेतृ आरजु राणा देउवाले लेखक डा.मल्लसँगको सामिप्यता बौद्धिक वा एक लेखकको रुपमा मात्रै नभएर पारिवारिक रहेको उजागर गर्दै बाग्लुङ राखुका मल्ल ठकुरीहरु आफ्ना मावली भएको र त्यसैले पनि डा.मल्ल र उहाँको परिवारसँग आफ्नो निकटता रहेको बताइन् ।
उनले पुस्तक आफुले पुरै नपढेपनि ऐतिहाँसिक र सामाजिक विषयबस्तुमा गहिरो अध्यन र अनुसन्धानात्मक तरिकाले लेखिएको दाबि गर्दै १० वर्षे सशस्त्र युद्ध हामी सबैले भोगेकै कुरा भएकोले हामी र हाम्रा परिवारमा के कस्तो मनोबैज्ञानिक असरहरु पार्यो भन्ने विषय गहनरुपमा उठाइएकोले पनि यि पुस्तकहरु पढ्नैपर्ने बताइन् ।
कार्यक्रममा शिखा बुक्सका सम्पादक पुष्पराज पौडेलले स्वागत गर्दै डा. मल्लमा लेखन शक्ति अति तिक्ष्ण भएको अनुभव बताए । उनले डा.मल्ललाई पुस्तक लेखन र प्रकाशनमा सधैं प्रेरणा दिने गरेको पनि बताए ।
साहित्यकार राजकुमार बानियाले एकैपटक सार्वजनिक गरिएका दुई पुस्तक मध्य ‘रुइसे दरबार’को समिक्षा गर्दै रुइसे दरबारमा ७ सय वर्ष पहिलेको इतिहाँस पढन् पाइने बताएका छन्। उनले पुस्तककोबारे सबै कुरा बताउन नहुने र हलुका समिक्षा स्वरुप बोल्दै पुस्तक पाठकले किनेर नै पढ्नसमेत सुझाएका थिए ।
साहित्यकार सुमन वर्षाले अर्को पुस्तक ‘सेतो धर्तीमा सप्तरङ्गी फूल’ कथा संग्रहको समिक्षा गर्दै कथा मार्फत लेखक डा.मल्लले समाजमा भएका विभिद पक्षहरुको उठान गरेको र बहु आयामिक कथाको संग्रह रहेको एउटा पढ्नैपर्ने कथासंग्रहको रुपमा प्रकाशन भएको बताइन् ।
पुस्तकका लेखक डा.मल्लले बडो मेहनतका साथ र आफुसँग समय नहुँदानहुँदै पनि लेख्ने हुटहुटिका कारण आफ्नो पिएचडीसँग सम्वन्धित विषयबस्तु पनि भएकाले यसलाई ढिलै भएपनि पुस्तकको रुपमा ल्याउन सफल भएको अनुभव सुनाएका थिए ।
डा.मल्लले आफुले सोचेको भन्दा धेरै राम्रो अर्थात भव्यरुपमा दुई पुस्तकको विमोचन गर्नपाएकोमा सबैलाई हार्दिक आभार र खुसीसमेत प्रकट गर्दै पुस्तकमाथि समिक्षा गर्ने सबै समिक्षकहरुलाई विशेष धन्यवाद दिएका थिए ।
डा.मल्लका ऐतिहासिक र सामाजिक विषयवस्तु उजागर गरेका दुबै पुस्तक शिखा बुक्सले प्रकाशन गरेको हो ।
विमोचन कार्यक्रममा कांग्रेस नेतृ डा.आरजु राणा देउवाका साथै पूर्व राजदूत प्रतिभा राणा, गृह सचिव विनोदप्रकाश सिंह, गायिका निशा देशार, शिखा बुक्सका सम्पादक पुष्पराज पौडेललगायतको उपस्थित रहेको थियो ।
कार्यक्रममा गायिका निशा देशारले डा.मल्लद्वारा लिखित ‘पाऊ हजुरको किन कष्ट गरिबक्स्यो’ बोलको गीत मार्फत गायिका देशारले म्युजिक अवार्ड समेत हात पारेको बताउदैं विमोचन कार्यक्रममा उक्त गीत गाएकी थिइन्।
