काठमाडौं ।
साविक च्याम्पियन लुम्बिनीलाई पराजित गर्दै सुदूरपश्चिम प्रदेशले यू–१९ राष्ट्रिय क्रिकेटको उपाधि जितेको छ ।
टियू क्रिकेट मैदानमा सोमबार भएको फाइनलमा लुम्बिनीलाई ६ विकेटले पराजित गर्दै सुदूरपश्चिम उपाधि हात पारेको हो ।
७ मंसिरमा शुरु भएको प्रतियोगितामा ७ प्रदेशको सहभागिता रहेको थियो । उपाधिसँगै सुदूरपश्चिमले २ लाख नगद प्राप्त गर्दा उपविजेता लुम्बिनीले १ लाख नगद हात पा¥यो ।
एकदिवसीय क्रिकेटमा टस जितेर पहिलो ब्याटिङ गरेको लुम्बिनी प्रदेश खराब प्रदर्शनको शिकार हुँदा ९३ रनमा नै समेटियो ।
लुम्बिनीलाई सस्तैमा समेट्न सुदूरपश्चिमका मिलन बोहोराले ५ विकेट लिए । जवाफमा उक्त लक्ष्य सुदूरपश्चिमले २१ ओभरमा ४ विकेट गुमाएर पूरा गरेको थियो ।
सुदूरपश्चिमका लागि गजेन्द्र बोहोराले ३९ रनको अविजित इनिङ खेल्दा दिपक बोहोराले २५ रन बनाएका थिए। अनुराग सिंह २२ रनमा आउट भए ।
लुम्बिनीका लागि रमेश कुर्मीले २ विकेट तथा निर्मल गुरुङ र अभिषेक गौतमले १÷१ विकेट हात पारेका थिए ।
त्यसअघि टियू मैदानमा टस जितेर पहिले ब्याटिङ गरेको लुम्बिनीले खराब प्रदर्शन गरेको थियो। उसका लागि आकाश त्रिपाठीले ३८ रन बनाउनु सर्वाधिक रह्यो ।
खराब ब्याटिङ गरेको लुम्बिनी २९ ओभर १ बलमा अलआउट हुँदै ९२ रनमा नै सीमित भएको थियो । आकाश बाहेक अन्यको प्रदर्शन निराशाजनक रह्यो । नर सार्कीले ११ रन बनाउँदा अन्य ब्याटरले दोहोरो अंकमा रन बनाउन असफल रहे ।
डिफेन्डिङ च्याम्पियन लुम्बिनी समूह चरणका ६ मध्ये ५ खेलमा विजयी भएर फाइनल पुगेको थियो। लुम्बिनी र सुदूरपश्चिमबीच गत संस्करणमा भएको फाइनल भने लुम्बिनीले १ सय १३ रनले जितेको थियो।
जारी संस्करणमा भने सुदूरपश्चिमले शतप्रतिशत नतिजा निकाल्दै उपाधि चुम्यो ।