शारीरिक सुगठन बिश्व प्रतिस्पर्धामा सहभागी हुदै सुजन

पोखरा, कात्तिक २१ ।

सुजन शिल्पकार नेपालीको लागि मात्र होइन बिश्व भरका शारीरिक सुगठन अथवा बडी बिल्डिङका लागि नौलो नाम होइन। स्वास्थ जीवन र फिट्नेसमा अर्जुनदृष्टि लागाएर अनवरत लागि रहेका सुजनले यो बितेका २ महिनामा मात्र एकदर्जन भन्दा बढी अवार्डहरु जित्दै आउदो नोभेम्बर १८ देखि २० सम्म इन्डोनेसियामा हुदै गरेको WWF world-championship 2022 तयारीमा छन्।

बिगतका बर्षहरु मा सुजनले यस क्षेत्रमा प्राप्त गरेका सफलताका सुचिहरु लामो छ । १६ बर्षको उमेर देखि शारीरिक सुगठनलाई आफ्नो शोख र जिबनको अभिन्न अंग बनाएका सुजन ‘स्वास्थ जीवन नै हाम्रो सबै भन्दा ठुलो सम्पति हो’ भन्ने कुरामा बिश्वास गर्छन । त्यहि उनको आत्माविश्वासले सुजनलाई एक पछि अर्को सफलताको खुड्किलो चढाएको छ । पर्सनल फिटनेस ट्रेनर बिषयको अध्ययन भर्खरै पुरा गरि हाल उनि पर्सनल फिटनेस ट्रेनरको रुपमा पनि कार्यरत छन् । आफुले जानेको, सिकेको र पढेको कुरा धेरै भन्दा धेरै यस क्षेत्रमा चाहाना भएकाहरु लाई सिकाउन र यस बिषयमा कम ज्ञान भएकाहरु लाई पनि स्वस्थ जीवनको लागि फिटनेसको महत्वको बारेमा सिकाउन पनि मन भएको बताउने सुजन नेपालको सुन्दर शहर पोखराका बासिन्दा हुन् ।

भर्खरै ( २९ अक्टोबरमा ) ब्रिसबेनमा सम्पन्न INBA PRO/ Am मा सुजनले २ गोल्ड २ सिल्भर र १ ब्रोंज मेडल जित्न सफल भएका छन्। द नेपाली टाईम्स अष्ट्रेलियाको कुराकानीमा उनले आफु नेपालको झन्डा बोकेर इन्डोनेसियामा हुदै गरेको अन्तराष्ट्रिय प्रतियोगितामा सहभागी हुन जान लागेको र यसले एकल प्रयासमा पनि देश चिनाउन पाउँदा आफुलाई ठुलो गौरब हुने बताए। नेपाल सरकार र खेलकुदलाई हेर्ने सरकारी निकायको आँखामा नपरेका सुजनले फेरि पनि यस प्रति ठुलो गुनासो राखेनन् उनले अगाडी भने ‘म निस्वार्थ भावले मनमा नेपाल र हातमा नेपाली झन्डा बोकेर खेलिरहेछु आशा छ एकदिन देशले र मेरा युवा साथिहरु ले यसलाई अपनत्व लिनुहुनेछ”।