काठमाडौं । विश्वकप छनोट तयारी अन्तर्गत नेपालको महिला राष्ट्रिय क्रिकेट टोली अहिले भारतमा छ ।
टोलीले बिहीबार (आज) देहरादुनस्थित आयुस क्रिकेट एकेडेमीमा भारतको राजस्थानविरुद्ध पहिलो मैत्रीपूर्ण खेल खेल्दैछ ।
उत्तराखण्ड क्रिकेट एशोसिएसनको आयोजनामा आजदेखि मंसिर ३ गतेसम्म हुने श्रृंखलाका लागि नेपाली टोली दुई दिनअघि भारत पुगेको हो ।
यस श्रृंखलामा नेपालले भारतका तीन राज्य टोली—राजस्थान, पश्चिम बङ्गाल र उत्तराखण्डसँग कुल ६ खेल खेल्नेछ ।
त्यस्तै नेपाली टोलीले भोलि उत्तराखण्ड र पर्सि पश्चिम बङ्गाल खेल्ने नेपाल क्रिकेट संघ (क्यान) का केन्द्रीय सदस्य वीरेन्द्र बहादुर चन्दले बताउनुभएको छ ।
उहाँका अनुसार टोलीले मंसिर १ गते पुनः राजस्थान, २ गते उत्तराखण्ड र अन्तिम खेल ३ गते पश्चिम बङ्गालसँग खेल्नेछ ।
विश्वकप छनोटको लागि तयारी गर्दै गरेको नेपाली टोलीको कप्तानमा इन्दु बर्मा हुनुहुन्छ । उहाँको नेतृत्वमा खेलाडीहरु कविता कुँवर, साना परविन, रुबिना क्षेत्री, अलिशा यादव, इश्वरी विष्ट, रोमा थापा, अश्मिना कर्माचार्य, सवनम राई, विन्दु रावल, पूजा महतो, लक्ष्मी साउद, मनीषा उपाध्याय, सीमाना केसी र ममता चौधरी रहेका छन्।
यस अभ्यास श्रृंखलाबाट टोलीले खेल रणनीति र समन्वयमा सुधार ल्याउने अपेक्षा क्यानले गरेको छ ।
