काठमाडौं, माघ २० । आईसीसी टी–२० विश्वकपको तयारीमा भारत पुगेको नेपाली राष्ट्रिय क्रिकेट टोलीले मंगलबार(आज) आफ्नो पहिलो अभ्यास खेल खेल्दैछ ।
नेपालले आज युएईसँग चेन्नईमा प्रतिस्पर्धा गर्नेछ भने खेल नेपाली समयअनुसार बेलुकी सवा ५ बजे सुरु हुनेछ ।
विश्वकपअघि टोलीले अभ्यासलाई तीव्र बनाउँदै दोस्रो मैत्रीपूर्ण खेल पर्सि बिहीबार क्यानडाविरुद्ध खेल्ने तालिका छ ।
कप्तान रोहितकुमार पौडेलको नेतृत्वमा नेपालले यसअघि नै १५ सदस्यीय अन्तिम टोली घोषणा गरिसकेको छ ।
यसअघि नेपालले श्रीलङ्कमा श्रीलङ्क ‘ए’ र भारतमा एमसीए प्रेसिडेन्ट–इलाभेनसँग समान ३ वटा अभ्यास खेल खेलेको थियो ।
नेपालले भारतको मुम्बईमा आफ्नो समूह चरणका सबै खेल खेल्नेछ । नेपाल रहेको समूह ‘सी’मा इङ्ल्यान्ड, वेस्ट इन्डिज, स्कटल्यान्ड र इटाली रहेका छन् ।
नेपालले माघ २५ गते आइतबार इङ्ल्यान्डसँग खेल्दै विश्वकप यात्राको सुरुवात गर्दैछ । यस वर्षको टी–२० विश्वकप फेब्रुअरी ७ देखि मार्च ८ सम्म भारत र श्रीलङ्कामा संयुक्त रूपमा आयोजना हुँदैछ ।
