काठमाडौं । प्रधानमन्त्री पुष्पकमल दाहाल प्रचण्डले फिल्म फेस्टिभललाई सघाउन सरकार तयार रहेको बताउनुभएको छ ।
आज बुधबार नेपाल अन्तर्राष्ट्रिय चलचित्र महोत्सव (निफ)का प्रतिनिधिहरुलाई बालुवाटारमा भेट्दै उहाँले फेस्टिभलको माध्यमबाट फिल्म पर्यटनको विकास हुने बताउनुभयो ।
मुलुकमा धेरैभन्दा धेरै फिल्म महोत्सव आयोजना हुनुपर्ने आवश्यकता रहेको बताउदै सिनेमा टुरिजममा फिल्म फेस्टिभलको महत्वबारे चर्चा गर्नुभयो ।
महोत्सव प्रमुख केपी पाठकले प्रधानमन्त्रीलाई फेस्टिभलको प्रमुख अतिथिको निम्तो समेत दिएको जानकारी दिनुभयो ।
चैत २ देखि ६ गतेसम्म काठमाडौंमा ‘विश्वभरका कथाहरुको उत्सव’ नारासहित हुने फेस्टिभल क्यूएफएक्सका काठमाडौं उपत्यकामा रहेका सिनेमा हलहरुमा आयोजना हुँदैछ ।
उक्त फेस्टिभलमा ३५ देशका ९६ फिल्म प्रदर्शन हुँदैछन् ।