कात्तिक १५, पोखरा ।
पोखरा विश्वविद्यालय सेवा आयोगका नवनियुक्त अध्यक्ष र सदस्यलाई स्वागत तथा बधाई कार्यक्रम पोखरा विश्वविद्यालयको केन्द्रीय कार्यालयमा सोमबार सम्पन्न भएको छ ।
पोखरा विश्वविद्यालय सेवा आयोगका नवनियुक्त अध्यक्ष प्रा तीर्थराज अर्याल र सदस्य प्रा डा उमानाथ बराललाई विश्वविद्यालयका उपकुलपति प्रा डा प्रेमनारायण अर्याल र रजिष्ट्रार प्रा डा दीपकबहादुर भण्डारीले खादा ओढाइ स्वागत तथा बधाई दिए ।
सेवा आयोगका नवनियुक्त अध्यक्ष प्रा तीर्थराज अर्यालले विश्वविद्यालयको नियम, कार्यविधिअनुसार आयोगका काम कारबाही अगाडि बढाउने बताउदैं प्राप्त जिम्मेवारीलाई सबैको साथ सहयोगले सफलता पुर्वक सम्पन्न गर्ने बताए ।
कार्यक्रममा उपकुलपति प्राडा अर्यालले विश्वविद्यालयको गरिमा उँचो राख्न सेवा आयोग सक्षम हुने बताउदै शिक्षक तथा कर्मचारीको सही व्यवस्थापन हुने विश्वास व्यक्त गरे ।
रजिष्ट्रार भण्डारीले सेवा आयोग विश्वविद्यालयको मेरूदण्ड भएको बताउँदै विवादरहित तरिकाले राम्रा र सक्षम शिक्षक तथा कर्मचारी छनोटमा आयोगको योगदान महत्वपूर्ण रहने बताए ।
सदस्य प्रा डा उमानाथ बरालले पोखरा विश्वविद्यालयको गरिमामय पहिचान रहेको उल्लेख गर्दै आपसी सहयोगमा आफ्नो पदीय दायित्व र कर्तव्य निर्वाह गर्ने बताए ।
विश्वविद्यायको सूचना अधिकारी लोकप्रसाद ढकालका अनुसार प्रधानमन्त्री एवं पोखरा विश्वविद्यालयका कुलपति शेरबहादुर देउवाद्वारा पोखरा विश्वविद्यालय ऐन, २०५३ बमोजिम उनीहरू उक्त पदमा चार वर्षका लागि नियुक्ति भएका हुन् ।
प्रा अर्याल अङ्ग्रेजी र प्रा डा बराल राजनीतिक शास्त्रका प्राध्यापक हुन् ।
कार्यक्रमको सञ्चालन सह–प्रशासक तारादेवी सापकोटाले गरेका थिए ।
