पोखरा, पुस ९ । पद्माप्रेम थिएटरको प्रस्तुतिमा नाटक ‘मृत्यु यस्तो हुनु हुँदैन’ यही पुस २४ गतेदेखि २७ गतेसम्म पोखरा थिएटर गैह्रापाटनमा मञ्चन हुने भएको छ ।
साबित्र पाठक (सबु)को लेखन र सितला अधिकारीको निर्देशनमा तयार भएको यो नाटक समाजका गम्भीर यथार्थ, मानवीय संवेदना र जीवन–मृत्युका प्रश्नलाई केन्द्रमा राखेर प्रस्तुत गरिएको छ ।
यसअघि असोजमा मञ्चन हुने तयारी रहे पनि देशमा भएको जेन्जी आन्दोलनका कारण स्थगित भएको यो नाटक अहिले थप तयारीका साथ प्रदर्शन हुन लागेको हो ।
नाटककार साबित्र पाठक (सबु)का अनुसार यस अवधिमा नाटकको कथा, पटकथा र अभ्यासमा रहेका कमजोरीहरूलाई सच्याएर अझ उत्कृष्ट बनाइएको छ ।
चार दिनसम्म चल्ने यस नाटकको प्रदर्शन हरेक दिन साँझ ५ बजे हुनेछ । दर्शकको सहजताका लागि पुस २६ गते शनिबार दिउँसो १ बजे पनि विशेष शो राखिएको छ ।
यसरी जम्मा पाँच शो मञ्चन हुने आयोजकले जानकारी दिएका छन् ।
समाजका वास्तविक कथा र वरपरका घटना समेटिएको यस नाटकलाई सफल बनाउन व्यक्तिगत तथा संस्थागत सहयोग गर्न समेत थिएटरले आह्वान गरेको छ ।
समाजसँग सिधै जोडिने विषयवस्तु बोकेको यस नाटकले दर्शकलाई सोच्न बाध्य बनाउने विश्वास आयोजकले लिएको छ ।
