‘बाघको बङ्गारा’ को वल्र्ड प्रिमियर गर्दै सुरु भएको किम्फमा आज १३ फिल्म प्रिमियर हुँदै

नगेन न्यूज
  • ख-
  • ख+

काठमाडौं ।
हेर्ने कथा टिमले बनाएको मौरी काढ्ने डकुमेन्ट्री बाघको बङ्गाराको वल्र्ड प्रिमियर गर्दै २० औं काठमाडौं माउन्टेन फिल्म फेस्टिभल (किम्फ) सुरु भएको थियो ।
राष्ट्रिय सभागृह र पर्यटन बोर्डमा जारी अन्तर्राष्ट्रिय पर्वतीय फिल्म फेस्टिभल (किम्फ)को दोस्रो दिन शुक्रबार(आज) १३ फिल्म प्रिमियर हुँदैछन् ।
सम्भवतः यो नेपालको कुनै फेस्टिभलमा एकै दिन प्रिमियर हुने फिल्मको उच्च संख्या हो ।
केसाङ छेतेन निर्देशित ‘अ माइग्रेन्ट स्पिक्स’, नोर्बु पुनेलको ‘लिगेसी’, ऐश्वर्या बैदारको ‘ह्वेयर वाटर हाइसिनथ्स ग्रो’, दीपा श्रेष्ठ निर्देशित ‘ड्रिफ्टिङ क्लाउड’ र टिना मिरकारिमी निर्देशित ‘फ्रम सार्भेस्टान टु ओसन’को विश्व प्रिमियर हुँदैछ ।

पाँच फिल्मको एसिया प्रिमियर हुँदैछ । जसमा सोभित जैनको ‘बन्धुआ’, स्पेनी निर्देशक अलेजान्द्रो फेर्लिनीको ‘एल अलिजिबे’, इरानी निर्देशक अर्मन दास्टाकीको ‘जारी’ र ‘चामन’ र बेलायती निर्देशक मोहम्मद रजा मोहम्मदीको ‘रोया’ छन् ।

तीन फिल्म नेपाल प्रिमियर हुनेछन् । जसमा निग्मागेलु शेर्पा निर्देशित ‘काठमाडौं मनसुन’ र सूर्य शाही निर्देशित ‘ह्विल्स अन द बस’ छन् । चर्चित नेपाली डकुमेन्ट्री फिल्ममेकर केसाङ छेतेनको ‘अ माइग्रन्ट स्पिक्स’ले आप्रवासी कवि र युट्युबरले परिवारको जीवन चलाउन गरेको संघर्षको कथा भन्छ ।

‘ड्रिफ्टिङ क्लाउड’ले संखुवासभाको कथा भन्छ । २० वर्षअघि छुटेका साथीहरुले बाल्यकाल र यादहरुलाई कसरी पुनः स्मरण गर्छन् भन्ने कथा भन्छ ।
फ्रम सार्भेस्टान टु ओसन’ले रचेल नामक महिला पात्रको कथा भन्छ जो प्रशस्तै चुनौतीको सामना गरेर आफ्नो क्षेत्रमा जलसेनाको क्याप्टेन बन्छिन् । उनले यो पद कसरी प्राप्त गरिन् भन्ने कथा यसमा छ ।

शुक्रबारै निर्देशक फ्रान्सिसजेक बर्बेकाको उपस्थितिमा फिल्म ‘द डिजपिअरेन्स अफ जानुज क्लार्नर’, अनिल बुढा मगरको ‘आइरन डिगर’, गोपाल आचार्यको ‘आखत’, नेपाली निर्देशकद्वय भावना अधिकारी र डिम्पल राजथलाको ‘खुल्ला आकाश’, लिसा रुज्ली निर्देशित ‘सोफी लाभाड’ पनि प्रदर्शन हुँदैछन् ।

आजै जापानी फिल्म ‘अदामियानी’ र इटालीको फिल्म ‘गेम अफ द हाइड एण्ड सिक’ पनि स्क्रिनिङ हुनेछन् ।

बिहीबारदेखि सुरु भएको फेस्टिभलमा बलिउड अभिनेता प्रकाश झाको फिल्म ‘मट्टोकी साइकिल’को विशेष प्रदर्शन गरिएको थियो । फेस्टिभल ओपनिङ कमलकुमार र विद्या चापागाईंको ‘बाघको बंगारा’बाट सुरु भएको थियो ।

पाँच दिन चल्ने फेस्टिभलमा ३० देशका ६० फिल्म प्रदर्शन गर्ने तालिका छ । हिमाल एसोसिएसनको आयोजना र काठमाडौं महानगरपालिकाको सहआयोजनामा किम्फ भइरहेको हो ।

महोत्सवमा अन्तर्राष्ट्रियतर्फ प्रथम, दोस्रो र तेस्रो हुने फिल्मले क्रमशः दुई लाख, एक लाख ५० हजार र एक लाख रुपैयाँ पुरस्कारस्वरुप पाउनेछन् ।
नेपाली पानोरामाअन्तर्गत फिक्सन र डकुमेन्ट्री विधामा उत्कृष्ट ठहरिएका फिल्मलाई एक लाख र ७५ हजार नगद पुरस्कार दिइने बताइएको छ ।
इसिमोड सदस्य मुलुकबाट छानिएका उत्कृष्ट फिल्मले बेस्ट इसिमोड माउण्टेन फिल्म अवार्ड सहित एक हजार अमेरिकी डलर प्राप्त गर्नेछ । त्यसैगरी महोत्सवमा अत्यधिक दर्शकको मत पाउने फिल्मले ‘किम्फ अडियन्स अवार्ड’ मार्फत ५० हजार रुपैयाँ पाउने बताइएको छ ।

नगेन न्यूज पब्लिकेशन प्रा. लि. द्वारा संचालित यो अनलाईन डिजिटल पत्रिका हो । बि.सं. २०७२ साउन ११ गते देखि औपचारीक संचालित यो अनलाइनले मूलत शान्ति, पर्यटक, कला प्रबन्धन र समसामयीक समाचार प्रकाशन गर्दै आईरहेको छ ।
नगेन न्यूजको अनलाईन टिभी पनि संचालित छ । फेसवुक, ट्विटर, भाइवर, इन्स्टाग्राम टिकटकमा पनि हामी संग जोडिन सक्नु हुनेछ । जय कला क्रान्ति !!!
प्रतिक्रिया दिनुहोस्

संगीतकला

चित्रकला