काठमाडौँ– कोरोनाको कारण दुई वर्षयता रोकिएको चित्रकला प्रदर्शनी शुरु भएको छ। इ आर्ट्स नेपालको आयोजनामा आज (सोमबार) देखि आर्ट काउन्सिल बबरमहलमा चित्रकला प्रदर्शनी शुरु भएको हो।
कोरोनाको कारण केही समययता सुनसान रहेको माहोललाई उर्जावान् बनाउनका लागि चित्रकला प्रदर्शनी गरेको चित्रकार एरिना ताम्राकारले बताइन्। उनले कोरोनाका कारण चित्रकारहरुको कला घरमै मात्र सीमित रहेको भन्दै त्यसलाई थप उर्जावान बनाएर गति प्रदान गर्न यसले महत्वपूर्ण भूमिका खेल्ने आशासहित आयोजना चित्रकला प्रदर्शनी गरिएको बताइन्।
उनले भनिन्, ‘कोरोनाका कारण धेरै जना सिनियर आर्टिस्टहरुलाई समेट्न पाएनौँ, डाइरेक्ट ग्यालरिमै पेन्टिङ पुर्याउनेहरुलाई मात्र समेटेका छौँ। यस वर्ष हामीले हिमालयन आर्ट एग्जिबेशन मात्रै गर्यौँ, तर गत वर्षहरुमा दशैँअघि हिमालय आर्ट फेस्टिबल गर्यौँ। तर यसवर्ष यस्तो पेण्डामिक समयमा सहज छैन, यो वर्षको लकडाउनले हामीलाई निराश बनाएको छ, काम गर्ने मूड नै छैन, हामीले पेन्टिङ नकोरी समस्या हुन्छ, त्यसैले यस्तो बेलामा पनि काम गर्दै जाउँ भनेर गरेका हौँ, सबैलाई समस्या नै छ, आर्टिस्टलाई मात्रै होइन, सबैलाई यस्तै छ, तर आर्टिस्टलाई झनै समस्या छ, त्यसैले यस्तो बेलामा पनि फेस्टिबल आयोजना गरेका हौँ।’
प्रदर्शनीमा व्यवसायिक चित्रकार प्रमिला बज्राचार्यले कोरोना केही सामान्य भएको अवस्थामा नेपाली चित्रकारहरुलाई केही सहज होस् भनेर यो प्रदर्शनी गरेको बताइन्। उनले प्रदर्शनीमा ६० भन्दा धेरै व्यवसायिक चित्रकारहरु उपस्थित रहेको बताइन्।
उनले भनिन्, ‘कोरोना अलि नर्मल भएको बेला गरौँ, नेपाली आर्टिस्टहरुलाई अलि इजी पनि होस् भनेर हामीले एग्जिबेशन गरेको हो। यहाँ ६०,६५ जति आर्टिस्टहरु हुनुहुन्छ। हामीले दशैँ अगाडि गर्दै आएको हो, यस वर्ष फेस्टिभल गर्न सकेनौँ तर एग्जिबेशन गरेका हौँ।’
चित्रकला प्रदर्शनीमा सहभागि चित्रकार सञ्जु श्रेष्ठले अनलाइनबाट प्रदर्शनी गर्नुपर्ने बाध्यतालाई चिर्दै भौतिक उपस्थितीमै चित्रकला प्रदर्शनी गर्न पाउँदा खुशी महशुस गरेको बताइन्। उनले यसरी भौतिक उपस्थितिमै गरिने प्रदर्शनीले चित्रकारहरुमा शक्ति, जोश र जाँगर आउने बताइन्।
उनले भनिन्, ‘कोरोनाको पेण्डामिकले गर्दा फ्री भएर काम गर्न नपाइरहेको अवस्थामा त्यसमाथि मेण्टल्ली भित्रबाट बाँधिरहेको अवस्थामा यो फेस्टिबल केही उत्साहका लागि गरेका हौँ। पेण्डामिकले सबै काम रोकिरहेको जस्तो भएको थियो। यस्ता प्रोग्रामले आर्टिस्टहरुलाई इनर्जी आउँदो रहेछ, अनलाइनबाट आर्ट देखाइरहेपछि फिजिकल्ली उपस्थित भएर देखाउन पाउँदा छुट्टै इनर्जी आउँदो रहेछ।’
हरेक वर्षको दशैँअघि गरिँदै आएको चित्रकला प्रदर्शनीमा कोरोना भाइरसको डरले यसवर्ष धेरै जना ठूला चित्रकारहरुलाई समेट्न नपाइएको उनले बताइन्। सोमबारदेखि शुरु भएको चित्रकला प्रदर्शनी भाद्र २० गते आइतबारसम्म चल्नेछ।
