पोखरा । पोखराको नागढुङ्गा आमा समूह २५ औँ वर्षमा प्रवेश गरेको छ । सो अवसरमा समुहले केक काटेर जयन्ती मनाएको छ ।
समूहका पूर्व अध्यक्षहरू पवित्रा गिरी, कमला गिरी, कमला केसी बोगटी, पोखरा महानगरपालिका वडा नम्बर ९ का वडा सदस्य नन्दराम गिरी, समूहका सल्लाहकार दुर्गाराज गिरी, नागढुङ्गा टोल विकास संस्थाका अध्यक्ष विष्णुप्रसाद सुवेदी, नागढुङ्गा आमा समूहका संस्थापक सनमाया गुरुङ लगायतले संयुक्त रूपमा केक काटेर शुभकामना साटासाट गर्दै रजत जयन्ती मनाएका हुन् ।
रजत जयन्ती मनाउने क्रममा संस्थाले समूह स्थापना गर्दादेखि अहिलेसम्मका आरोह अवरोह स्मरण गर्दै संस्था स्थापनामा स्वर्गीय गणेशमान पालिखे, स्व.भगवती राजभण्डारी, स्व.इमा गिरी लगायतले पु¥याएको योगदानको चर्चा गरेका थिए ।
त्यसैगरी समूहका संस्थापक अध्यक्ष पवित्रा गिरीले संस्था स्थापना गर्दाका संघर्षहरूको स्मरण गर्दै स्थापना कालमा आफूहरूसँग हातेमालो गर्नुहुने समाजसेवी गुरुदत्त लामिछाने, मनुमाया लामिछाने, स्व.खिना लामिछाने लगायतको योगदान स्मरण गर्नुभयो ।
समूहका निवर्तमान अध्यक्ष कमला केसी, लक्ष्मी गिरी लगायतले आफ्ना कार्यकालमा भए गरेका गतिविधिको चर्चा गर्दै बर्तमान कार्यकालसँगै आगामी दिनहरूमा आमा समूहको यात्रा गतिशील बन्नेमा विश्वास व्यक्त गर्नुभयो ।
कार्यक्रमका प्रमुख अतिथि समेत रहनुभएका जनप्रतिनिधि वडा ९ का सदस्य नन्दराम गिरीले नागढुङ्गाको ओरालो, भिरालो खेर गएको टुक्रो जमिनको उचित संरक्षण गर्दै आमा समूहले सुविधायुक्त भवन निर्माण गर्न सफल भएकोमा धन्यवाद व्यक्त गर्नुभयो । समूह यो अवस्थासम्म आइपुग्दा सहयोग गर्ने विभिन्न सहयोगीहरूलाई उहाँले कृतज्ञता जाहेर गर्नुभयो ।
संस्थाका अध्यक्ष कमला श्रेष्ठले आफूलाई यस समूहमा आबद्ध गराउन प्रेरणा प्रदान गर्नुभएका सनमाया गुरुङलाई धन्यवाद ज्ञापन गर्दै विगत लामो समयदेखि यो समूहमा आफ्नो आबद्धता र हालसम्मका क्रियाशीलताका बारेमा प्रकाश पार्नुभयो । आगामी दिनहरूमा समूहका सबै सदस्य एवं टोलका समाजसेवीहरूसँग हातेमालो गर्दै संस्थालाई एकताबद्ध तरिकाले अगाडि बढाउने उहाँले प्रतिबद्धता जाहेर गर्नुभयो ।
यसैबीच रजत जयन्ती समारोहकै अवसरमा समूहले अक्षय कोष स्थापनाको घोषणासमेत गरेको छ ।
अक्षय कोषका लागि एयरपोर्ट टोल विकास संस्थाका पूर्व अध्यक्ष समेत रहनुभएका समाजसेवी श्यामबहादुर श्रेष्ठले नगद रु. १० हजार प्रदान गर्दै अक्षय कोषको सुरुवात गर्नुभयो ।
समारोहमा आमा समूहका संस्थापक अध्यक्ष पवित्रा गिरी, संस्थापक सदस्य सीता गिरी, वडा सदस्य नन्दराम गिरीले पनि अक्षय कोषका लागि जनही पाँच÷पाँच हजार सहयोग गर्ने घोषणा गर्नुभयो ।
सोही समारोहमा पोखरा महानगरपालिका वडा नम्बर ९ ले आयोजना गरेको तथा नागढुंगा आमा समूहले संयोजन गरेको धुप बनाउने दुई दिने तालिमका प्रशिक्षक गीता पगेनीलाई धन्यवाद सहित सम्मान गरिएको थियो ।
तालिममा समूहका झण्डै दुई दर्जन महिला सदस्यले सहभागिता जनाएका थिए । समूहका सचिव पुष्पा गिरीले सञ्चालन गरेको कार्यक्रममा उपाध्यक्ष सीमा लामिछानेले स्वागत मन्तव्य राख्नुभएको थियो ।
