सङ्घर्षमा कलमले सम्झ्यो लुम्ले कविता गाउँ

पोखरा । शनिबारको दिन आकाश खुलेन भने एकातर्फ आकाशमा बादल फाटन् सकेन फेरि अर्कातर्फ पोखरेली कवि कलाकारको मनको बादल कोरोनाले फटाल्न सकेन । उपज कविताप्रेमी स्रष्टा साधकको उत्सवको दिन चैत्र १५ उत्सव बन्न सकेन । कवि कलाकार लुम्ले कविता गाउँ पुग्न सकेनन् । यद्यपि सङ्घर्षमा कलम साहित्य समाजले लुम्ले कविता गाउँ घोषणाको दिन विविध कोणबाट गौचन र कविता गाउँको स्मरण गरेको छ ।
कविता गाउँका प्रणेता विनोद गौचनका दाजु विश्वमोहन गौचनले विनोदका विविध आयाम र स्वभावका बारे चर्चा गरे । उहाँले विनोदलाई साधनामा घडीको सुई सर्दाको आवाज पनि अप्रिय लागेर व्याट्री निकालेर राखेको स्मरण गर्नुभयो । उहाँले सबैले बजारमा घर खोज्थे विनोद बजारमा कोलाहल भयो भन्दै शान्त ठाउँ खोज्दै तीन ठाउँमा घर सरेको पनि स्मरण गर्नुभयो ।
अन्तर्राष्ट्रिय नेपाली साहित्य समाज गण्डकी प्रदेश समितिका अध्यक्ष दुर्गाबहादुर शाह बाबाले विनोद गौचनको विनोदप्रियता र साहित्यप्रतिको लगाव स्तुत्य रहेको बताउनु भयो ।
जरोटुप्पो संरक्षण साहित्य समाज नेपालका महासचिव मदन भण्डारीले गौचनको पोखरामा फूल फुल्दैन भित्रको भावभंगीमा केन्द्रित उहाँको योगदानको स्मरण गर्न आवश्यक रहेको औल्याउनु भयो ।
गीतकार सुमन श्रापितले विनोद गौचनसँग आफूले केही समय संगत र साहित्यिक कर्म गर्न पाउनु आफ्ना लागि सौभाग्य रहेको बताउनु भयो ।
साहित्यकार रामनाथ अधिकारी संगीले नेताको गद्दारीले कवि कलाकार भोकभोकै मर्न परेकोमा चिन्ता व्यक्त गर्नु भयो ।
गजल सन्ध्या पोखराका पूर्व सह-सचिव विष्णु बास्तोलाले विनोद गौचनका विविधलाई आम जनमानस माझ पुर्‍याउन पोखरेली जान्नुपर्ने विचार राख्नुभयो ।
धार्मिक अभियन्ता वेदनिधि शर्मा अधिकारीले गौचन परिवारको साथ र सहयोगले आफ्नो जिन्दगीमा ठूलो महत्व राखेको बताउनु भयो ।
संस्थाका संस्थापक अध्यक्ष असफल गौतमले गौचनको योगदानलाई जीवन्त तुल्याउन लुम्ले कविता गाउँलाई क्रियाशील गराउन आवश्यक रहेको जिकिर गर्नु भयो ।
संस्थाका अध्यक्ष कृष्ण सारथिले संघर्षमा कलमले कविता गाउँ घोषणा हुँदाकै वर्षदेखि निरन्तर आफूलाई क्रियाशील गराउँदै स्रष्टा साधकको सम्मान, कृति प्रकाशन, चर्चा परिचर्चालगायतका कार्य गर्दै आएको बताउनु भयो । उहाँले गठन हुन लागेको गण्डकी प्रज्ञा प्रतिष्ठानमा दुर्गाबहादुर शाह बाबाले कुलपति, मदन भण्डारी र सुमन श्रापित लगायतले सदस्यमा उम्मेदवारी पेश गरेकामा खुसी व्यक्त गर्दै राम्रा प्रतिभालाई कसैले छेक्न नसक्ने बताउनु भयो ।
संस्थाका उपाध्यक्ष पूणर् नेपालीले संस्थाका गतिविधिलाई माया ममता राखेर साथ र सहयोग पुर्‍याउने सम्पूणर्लाई आभार व्यक्त गर्दै संस्थाले आफ्नो युट्युब च्यानल सक नेपालका माध्यमबाट साप्ताहिक सिर्जनामैत्री कार्यक्रम सर्जाम सञ्चालन गर्दै आएको जानकारी गराउनु भयो ।
२०६५ सालको चैत्र १५ गते कास्कीको लुम्ले गाउँलाई विशेष समारोहका बीच कविता गाउँ लुम्ले घोषणा गरिएको थियो ।

Facebook Comments Box