लोक गायक स्वःप्रवीण गुरुङको स्मृतिमा जन्म गाउँ लुम्लेमा अर्धकदको शालिक

पोखरा । लोक गायक स्वः प्रविण गुरुङको स्मृतिमा उहाँको जन्म गाउँ अन्नपूणर्-६ लुम्लेमा हुने कार्यक्रमको तयारी तीब्र पारिएको छ । आयोजक रिनी म्यु (दिदीबहिनी दाजुभाई) समाजले पत्रकार सम्मेलन मार्फत जानकारी दिएको हो ।
कार्यक्रम यहि चैत १७ गतेदेखि २१ गतेसम्म हुदैछ । स्वः प्रविण गुरुङ स्मृति प्रतिष्ठान गठन गर्ने, गुरुङको शालिकको संरक्षण र व्यवस्थापन गर्ने, स्वदेश तथा विदेशमा गुरुङलाई चिनाउने मुल उद्देश्य राखी कार्यक्रम गर्न लागिएको पत्रकार सम्मेलन मार्फत जानकारी दिइएको हो ।
अन्नपूणर् गाउँपालिकाको विशेष सहयोगमा हुने उक्त कार्यक्रममा खुल्ला दोहोरी गीत प्रतियोगिता, स्रष्टा सम्मान, दोस्रो गाउँ स्तरीय पुरुष भलिवल प्रतियोगिता, लेकाली व्याडको लाइभ कन्सर्ट साथमा विविध सांस्कृतिक कार्यक्रम गरिने समितिका समितिमा सचिव राजु गुरुङले जानकारी दिनु भयो । जसअन्र्तगत दोहोरीगीत तर्फ ८ समूह र भलिवलतर्फ २० समूहले प्रतिष्पर्धा गर्नेछन् ।
सो अवसरमा समाजका वरिष्ठ सल्लाहकार आइबहादुर गुरुङ, वडाध्यक्ष चित्रबहादुर गुरुङ, समाजका अध्यक्ष टेकबहादुर गुरुङ, मूल समितिका सदस्यहरु नविन गुरुङ र जीवन दाहाल, खेल संयोजक रोहित गुरुङ लगायतले कार्यक्रमको औचित्य माथि प्रकाश पार्दै लाहुरे परिवारमा जन्मेर पनि स्वः प्रविण गुरुङ गीत संगितको क्षेत्रमा लागेको, गाउँले जनजीवनलाई आफ्नो सिर्जनामा उतारेको बताएका थिए ।
कार्यक्रम अन्र्तगत यहि चैत २० गते गाउँपालिका अध्यक्ष युवराज कुँवरको हातबाट स्वः गुरुङको शालिक अनावरण, स्वः धनबहादुर गायकलाई मरणोप्रान्त तथा लेकाली व्याण्डका भोकलिष्ट नविन गुरुङलाई पनि सम्मान गर्ने कार्यक्रम रहेको छ ।
दोहोरीतर्फ प्रथम हुने समूहले रु.२० हजार, द्वितीयले रु.१५ हजार, तृतीयले १० हजार तथा सान्त्वनालाई रु.६ हजार साथमा प्रमाणपत्र पुरस्कारको व्यवस्था गरिएको छ ।त्यस्तै भलिवलमा प्रथम रु.५० हजार ५ सय ५५, द्वितीय ३० हजार ५ सय ५५, तृतीय १५ हजार ५ सय ५५ र सान्त्वना रु. ५ हजार साथमा मेडल र प्रमाणपत्र पुरस्कार दिइने छ । त्यस्तै वेष्ट प्लेयर, ब्लकर र सर्भिसलाई पनि आकर्षक पुरस्कारको व्यवस्था गरिएको छ ।
वि.स २०१८ माघ १ गते जन्मेका स्वःप्रवीण गुरुङको गीतसंगितको क्षेत्रमा लाग्दालाग्दै मिति २०५१ साउन २२ गते काठमाण्डौमा सवारी दुर्घटनामा परी निधन भएको थियो । १० वर्षको उमेरबाट घर छाडी सांगीतिक यात्रामा निस्केका गुरुङले डाँफे कला मन्दिरमा नृत्य साथै गायन सिक्नु भएको थियो ।
तत्कालिन गण्डकी अञ्चल स्तरीय गायन प्रतियोगितामा प्रथम हुन सफल गुरुङले पाण्डव सुनारसँग सम्पर्क पश्चात राष्ट्रिय नाचघर काठमाण्डौमा काम पनि गरेका थिए।
स्वः गुरुङका यो दाजुको मिरमिरे आँखा, सालैजो हितैको माया, फूल मायामा नभुल, माथीबाट को आयो सालको पात बजाउँदै लगायतका गीतहरु चर्चित छन् ।

Facebook Comments Box