पर्यटन व्यवसायी मजुदरलाई खोप अभियान सुरु

पोखरा । नेपाल पर्यटन बोर्ड पोखराको परिसरमा पर्यटन, उद्योग वाणिज्य तथा आपूर्ति मन्त्री मणिभद्र शर्मा र कानुन, सञ्चार तथा प्रदेश सभा मामिला मन्त्री विन्दुकुमार थापाले पर्यटन व्यवसायीलाई खोप कार्ड हस्तान्तरण गर्दै पर्यटन व्यवसायी र मजदुरलाई औपचारिक रुपमा कोभिड विरुद्धको खोप अभियान सुरुवात गरेका छन् ।
पर्यटन, उद्योग वाणिज्य तथा आपूर्ति मन्त्री मणिभद्र शर्माले विहिबारबाट सुरुवात गरेको अभियान प्रदेशका अन्य दश जिल्लामा पनि लगात्तै सुरुवात हुने जानकारी गराउँदै खोपको कारणले कोही पनि निराश नबनि, उच्च मनोबलका साथ आआफ्नो सेवामा जुट्नको लागि सबैमा अनुरोध गर्नुभएको छ ।


कानुन मन्त्री थापाले पर्यटन व्यवसायीहरुले धेरै अगाडी देखिबाट खोपको माग गर्दै आएकोमा वर्तमान सरकारले उहाँहरुको माग अनुसार सम्बोधन सुरुवात गरेको बताउँदै व्यवसायीहरुको मागलाई निरन्तर रुपमा सम्बोधन गर्ने जनाउनु भयो ।


मन्त्रीद्वय शर्मा र थापाले पोखरा पर्यटन परिषदको संयोजनमा निर्धारण गरिएका पाँच वटै खोप केन्द्रको निरीक्षण गर्दै व्यवसायीहरुले राम्रो व्यवस्थापन गरेमा प्रशंसा गरेका छन् । पहिलो सुरुवाती चरणमा थोरै मात्रमा भएपनि सम्बोधन भएको र गण्डकी प्रदेश सरकारले प्राथमिकतामा राखेर खोप अभियानलाई निरन्तरता दिने बताएका छन् ।
नेपाल पर्यटन बोर्डमा टान, पश्चिमाञ्चल क्षेत्रिय संघ, एन.एम.ए, ओटेफ र टेवान, माउन्ट कैलाशमा रेवान पोखरा र नेपाल हवाई खेलकुद संस्था, होटल बाराहीमा पश्चिमाञ्चल होटल संघ र पोखरा पर्यटन परिषद, बोम¥याङ्ग रेष्टुरेन्टमा नाट्टा गण्डकी प्रदेश, एगा पोखरा, टेसा पोखरा, एन.टि.भि ए र द विच रिसोर्टमा भिटोफ, मनि चेन्जर, स्पा, डुङ्गा एशोसिएसन, टुरिष्ट बुक सप, सिटी टुर गाईड, अखिल मजदुर संघ, युनिट्राभ र फेवा पर्यटन विकास समिति, थान्का एण्ड प्रिन्टिङ, नेशनल टुर गाईड लगायतलाई खोप लगाउने व्यवस्था मिलाईएको परिषदका कार्यवाहक अध्यक्ष पोम नारायण श्रेष्ठले बताउनु भयो ।
गण्डकी प्रदेशका मुख्य पर्यटन केन्द्र पोखरामा आज देखि पर्यटन व्यवसायी र मजदुरहरुलाई औपचारिक रुपमा कोभिड विरुद्धको खोप अभियान सुरु भएकोमा खुसी व्यक्त गर्दै पोखरा पर्यटन परिषदका पूर्व अध्यक्ष गणेश बहादुर भट्टराईले आन्तरिक पर्यटन प्रबद्र्धनका लागि खोप अभियानलाई निरन्तरता दिनु पर्नेमा जोड दिनु भयो ।
त्यसै गरी रेवान पोखराका पूर्व अध्यक्ष चौ बहादुर गुरुङले ढिलै भएपनि खोप पाएकोमा पर्यटन क्षेत्रमा खुसीयाली ल्याएकोले थप खोप तत्कालै व्यवस्थापन गरिदिन सरकारसँग अनुरोध गर्नु भयो ।
पश्चिमाञ्चल होटल संघका पूर्व अध्यक्ष भरतराज पराजुलीले होटलमा धेरै कर्मचारीहरु भएकाले पर्याप्त मात्रामा खोप नपुगेको भएता पनि व्यवसायीमा उत्साह मिलेको बताउनु भयो ।
टान गण्डकीकी महासचिव कमला गिरीले यस पहिला लगाएका पर्यटन सवारी साधनहरुका चालकहरु केही मात्रमा खोपबाट वञ्चित हुँदा आज बनाईएको योजनामा केही प्रभावित भएकाले खोप अभियानलाई निरन्तरता दिनु पर्ने बताउनु भयो । गिरीले अब छिट्टै पोखरालाई सुरक्षित गन्तव्यको रुपमा घोषणा गरी आन्तरिक पर्यटकहरुलाई भित्राउने र प्रदेश भरी सन्देश प्रवाह गर्न सकेमा छिमेकी देशबाट पनि पर्यटकहरु भित्रने कुरामा सम्पूर्ण व्यवसायीहरु ढुक्क भएको जनाउनु भयो ।


आज पोखरा पर्यटन परिषद मार्फत २ हजार पाँच सय खोप वितरण भएको हो भने उद्योग वाणिज्य संघ र अन्य व्यवसायीक संघ संस्थाहरुले भोलीबाट क्रमशः खोप कार्यक्रम सुरु गर्ने स्वास्थ्य निर्देशनालयले जनाएको छ ।

Facebook Comments Box